WAZIRI ANAYEPENDA URODA WA BODABODA

 

Adeladius Makwega-MWANZA

Asubuhi ya Februari 9, 2024 Mwanakwetu alikutana na video fupi kwenye anuani hii,

https:www:facebook.com/share/r/pAnSuwGyFzxfcgf/?mbextid=oFDknk,

ikiwaonesha vijana wawili wakiwa wamevalia sare za CCM, mashati ya kijani, mmoja la mikono mirefu na mmoja la mikono mifupi, huyu wa mikono mifupi amevaa kofia na miwani juu yake, wote wamevaa suruali nyeusi.

Kunogesha uroda wao wa kupanda boda boda hiyo aliyepakizwa akishika na bendera ya CCM mkono wa shoti. Akilini kwa Mwanakwetu ilimjia taswira kuwa ni yaleyale yanayolalamikiwa katika ziara za ndugu Paul Makonda-Katibu Muenezi CCM Taifa.

Mwanakwetu akasema moyoni,

“Vijana wanafanya mikogo katika vyombo vya moto! Jamani pikipiki siyo baiskeli, eti ukaweka miguu migoko breki , hapo hakuna bampa, hapo bampa ni mwili wako.”

Mwanakwetu akasema tena moyoni.

“Hawa jamaa wanakiharibia sana Chama Cha Mapinduzi, bila ya wao kuliona hilo lakini pia wanalipa Jeshi la Polisi Tanzania wakati mgumu sana katika kusimamia Sheria na Kanuni za Usalama Barabarani, labda askari hodari wa usalama barabarani bado wapo likizo za mwaka mpya ?”

Mwanakwetu aliangalia na kunukuu namba ya pikipiki hiyo kuwa ni MC 841 DVX na mara akayasikia maneno kutoka kwa abiria aliyepakizwa akisema

“...eeee bwana eee , siyo lazima upande hiyooo...”

Mwanakwetu alipotazama jina la ukurasa huo ulikuwa ukiitwa Dodoma Zone na ukifuatiliwa na watu 243 K , huku video hiyo ikitazamwa na watu 1.2 K na waliotoa maoni yao ni watu 1.4K hadi Februari 9, 2024.

Mwanakwetu alipowatazama vizuri wahusika hao alibaini kuwa sura hizo zinafanana wanasiasa wa Tanzania ambao ni wabunge wa Bunge la Jamhuri ya Muungano wa Tanzania Ndugu Antony Mavunde ambaye ndiye Waziri wa Madini wa Tanzania na Deo Ndyejembi ambaye ni Naibu Waziri wa TAMISEMI ambazo zote ni Wizara za Jamhuri ya Muungano wa Tanzania

Mwanakwetu akastajabu sana moyoni mwake kumbe Mawaziri/Mawaziri Wadogo Wanapenda Uroda wa Bodaboda!

Hawa ni mawazri ambao kwa nafasi yao ya Ubunge na Uwaziri wanayo magari yanayoendeshwa na madereva na wasaidizi wao labda wapo likizo.

Kwa nia yao, wao wenyewe waliamua kupanda pikipiki hiyo na kurekodiwa, huku mmoja kuwa dereva wa pikipiki hiyo, maswali ni je huyo dereva anayo leseni ya kuendesha pikipiki? Tuamini anayo, swali la pili, je kwa nini hawakuvaa kofia za kujikinga na ajali?

Hawakumbuki Mwanakwetu anasema,

“Vijana wanafanya mikogo katika vyombo vya moto, jamani pikipiki siyo baiskeli eti ukaweka breki migoko, hapo hakuna bampa, hapo bampa ni mwili wako.”

Kwa mwaka 2023 yupo mbunge mmoja aliyefariki kwa ajali ya bodaboda na hilo kusababisha kufanyika kwa uchaguzi wa jimbo na jimbo hilo likapata mbunge mpya , kufanyika uchaguzi wa kuziba pengo ni gharama kwa taifa letu, hilo litokee kwa bahati mbaya sawa na siyo kwa kujitakia, pesa hizo ziende hata kujenga zahanati vijijini.

Kwa hakika video hiyo ya Mavunde na Ndyejembi imemkwaza sana Mwanakwetu siku ya leo.

Mwanakwetu anasema nini siku ya leo?

Kwa mwaka 2023 yupo mbunge mmoja aliyefariki kwa ajali ya bodaboda na hilo kusababisha kufanyika kwa uchaguzi wa jimbo na jimbo hilo likapata mbunge mpya , kufanyika uchaguzi wa kuziba pengo ni gharama kwa taifa letu, hilo litokee kwa bahati mbaya sawa na siyo kwa kujitakia, hapo heri pesa hizo ziende hata kujenga zahanati vijijini.

Je Antony Mavunde na Deo Ndejembi hawaoni kwa kufanya hivyo nia yao ni kuisababishia Jamhuri ya Muungano wa Tanzania hasara ?

Je wao kama mawaziri hawaoni kuwa kufanya hivyo wamevunja Sheria na Kanuni za Usalama Barabarani na wanapaswa kuadhibiwa mara moja?

Kwa hakika video hiyo inaonesha wazi na fika kuwa papo mahali pana shida, lazima pafanyiwe maarifa mapema sana, maana kitendo hicho hakitoi picha na fundisho bora kwa watoto na vijana wadogo wa Kitanzania.

Kwa hivi sasa ukienda trafiki na mahakamani, utakutana na waendesha mashtaka, polisi na mahakimu wakipata tabu na mashauri mengi ya kukiukwa kwa Sheria na Kanuni za Usalama Barabarani.

Je Antony Mavunde na Deo Ndyejembe kwa kufanya kitendo hicho hawaoni kuwa ni kuwakatisha tamaa Kikosi cha Usalama Barabarani, Waendesha Mashitaka na Mahakimu/ Majaji wa Tanzania?

Mwanakwetu anawaambia ndugu hao wawili watambue kuwa Ubunge waliona na hata huo Uwaziri siyo mali yao, bali ni mali ya Watanzania, ili wao wabaki salama katika nafasi hizo wanawajibika kuheshimu Sheria zetu zote ikiwamo hii ya Usalama Barabarani na Kanuni zake.

Mwanakwetu kwa heshima zote anawaomba Jeshi la Polisi Tanzania hasa Kikosi cha usalama Barabarani, Waendesha Mashtaka na Mahakimu/ Majaji msikate tamaa nyie fanyeni kazi na anzeni na hilo la Mavunde na Ndyejembi.

Kama Waziri anashindwa kuheshimu Sheria na Kanuni za Usalama Barabarani hadharani ambayo inamlinda hata yeye kwa uhai wake, je ataweza kweli kulinda Sheria na Kanuni za madini ambayo ni mawe tu hata likichukuliwa yeye hapati madhara yoyote mwilini? Au anaweza kweli kuheshimu na kulinda sheria ndogo ndogo  za halmashauri zetu anazozipitisha ?

Mwanakwetu upo?

Kumbe Mawaziri Wanapenda Uroda wa Bodaboda EeeH

Nakutakia siku Njema

makwadeladius@gmail.com

0717649257